2. Alison

Anonymous. c. 1300


BYTUENE Mershe ant Averil
  When spray biginneth to spring,
The lutel foul hath hire wyl
  On hyre lud to synge:
Ich libbe in love-longinge
For semlokest of alle thynge,
He may me blisse bringe,
  Icham in hire bandoun.
An hendy hap ichabbe y-hent,
Ichot from hevene it is me sent,
From alle wymmen my love is lent
  Ant lyht on Alisoun.

On heu hire her is fayr ynoh,
  Hire browe broune, hire eye blake;
With lossum chere he on me loh;
  With middel smal ant wel y-make;
Bote he me wolle to hire take
For to buen hire owen make,
Long to lyven ichulle forsake
  Ant feye fallen adoun.
An hendy hap, etc.

Nihtes when I wende and wake,
  For-thi myn wonges waxeth won;
Levedi, al for thine sake
  Longinge is y-lent me on.
In world his non so wyter mon
That al hire bounte telle con;
Hire swyre is whittore than the swon,
  Ant feyrest may in toune.
An hendy hap, etc.

Icham for wowyng al for-wake,
  Wery so water in wore;
Lest eny reve me my make
  Ichabbe y-yerned yore.
  Betere is tholien whyle sore
  Then mournen evermore.
    Geynest under gore,
    Herkne to my roun--
An hendy hap, etc.


bandoun
thraldom
bote he
unless she
buen
be
feye
like to die
for-thi
on that account
for-wake
worn out with vigils
geynest under gore
comeliest under woman's apparel
he
she
hendy
gracious
hire her
her hair
ich libbe
I live
ichot
I wot
levedi
lady
loh
laughed
lossum
lovesome
lyht
alighted
make
mate
may
maid
nihtes
at night
on hyre lud
in her language
reve
rob
roun
tale, lay
semlokest
seemliest
so water in wore
as water in a weir
so wyter mon
so wise a man
swyre
neck
tholien
to endure
wende
turn
wonges waxeth won
cheeks grow wan
y-hent
seized, enjoyed
y-lent me on
arrived to me
y-yerned yore
long been distressed
The Oxford Book of English Verse, HTML edition